Poslovne vesti - Makedonija

Кредитни линии за поголема профитабилност

Кредитните линии што моментно им се нудат на македонските мали и средни претпријатија од повеќе финансиски институции во земјава овозможуваат фирмите да го подигнат квалитетот на своите производи и со тоа да станат поконкурентни и да ја зголемат профитабилноста.

Македонската банка за поддршка на развојот (МБПР), како што беше речено на работилницата "Пристап до извори на финансирање", од сопствениот капитал обезбедува инвестициски кредит за финансирање мали и средни претпријатија до 500.000 евра со рок на отплата 8 години, една година грејс-период и 8 отсто фиксна каматна стапка. Потоа, кредитна линија за поддршка на извоз со максимален износ од два милиона евра, 12 месеци отплата и 7 проценти камата, како и кредитна линија за трајни обртни средства до 300.000 евра, три години рок на отплата и 8 отсто фиксна каматна стапка. Банката со поддршка на странски капитал реализира и кредитни линии за енергетска ефикасност, за обновливи извори на енергија, како и за зголемување на вработеноста.

Преку ААГ Комуникации (Analysis and Advisoring group) достапна е кредитната линија за поддршка на мали и средни претпријатија доколку инвестираат во подобрување на еколошките стандарди, стандардите за безбедност при работа или во подобрување на квалитетот на производите и услугите.

- Целта на овој кредит е да се зголеми капацитетот на претпријатијата во однос на подобрувањето на стандардите во нивното еколошко функционирање, да се обидат да направат инвестиција што ќе значи усогласување со националното законодавство, но и со европските директиви посебно во заштитата на животната средина, безбедноста при работа и поголемиот квалитет на производите и услугите - рече Верица Хаџивасилева Марковска од ААГ Комуникации.

Кредитната линија за која се обезбедени 15 милиони евра, почна во август минатата година и трае 30 месеци. На фирмите им се даваат две можности, првата е да користат техничка помош од консултанти за да се подготоват да земат кредит, а втората е заемот.

Развојната фондација Кримсон нуди кредитни програми, но само за проекти или правни субјекти кои имаат американски партнер со најмалку 25 отсто сопственост. Притоа, американскиот партнер мора да докаже профитабилност и да има има искуство во ваков тип активности.

- Обезбедуваме заем од 2 до 250 милиони долари со фиксна каматна стапка до 15 години. Поголем дел од средствата, 65 отсто, се за финансирање нови проекти, а 35 проценти се за поддршка, односно проширување на постојните - вели Дарко Арсов од Кримсон Капитал Македонија.

Работилницата "Пристап до извори на финансирање" ја организираше Американската стопанска комора во Македонија.